DTS isch verbi...

Hallo zämä...

Ig medle mi ou wieder mau.... Aber we ig geng aues i Blog schribe hanni ja nümme ds verzelle (billegi Usred)

Mir hei hüt grad üsi Diplomfiir gha. Etzä isch DTS offiziell verbi und mir hei üses Diplom übercho. Di meist wärde am Sonntig oder Mäntig hei ga. Ig ha no 2 Wuche meh hiä befor ig de ändlech wieder hei chumä. Ig ma fasch nüme warte euch wieder ds gseh. I denä zwo Wuche weiss ig no ned gnau was ig machä. Am liebste wür ig mitemä Segelschiff ufenä anderi Insle segle. Das chönnt aber no schwer wärde ds finde.... Mau luege was Gott offe het für mi..

Diä letschi Wuchä isch chli ermüedend gsi. Mir hei viu Gspräch gha und di meiste hei gwartet bis si endlech hei chöi. Drum bini ou froh, dass dSchueu etzä verbi isch. 

Ich chume am 13. Juli am 14.30 Uhr Zürich am Flughafä ah. dFlugnummer isch US5664 mit dr Lufthansa vo Frankfurt. Es wär hennä cool we es paari chönnt a Flughafe cho oder schüsch am abe schneu cho verbi luege... =)

so... wünsche euch ä cooli zit

bis scho gli umä real

bye bye 

Michu

Back in HongKong

Hey,
Nach langem wartae hani ou mau es paar minute am Compi. Mir si gester, nach 30 Stung im Zug, ds HongKong acho. Und da HongKong so andersch isch, choei mir ou umae uf ds Internet. Ds Erdbebae het ues ned gross bedroffae. Dafuer bini no dankbar gsi...
I probiere mau ae langi Gschicht ds churz ds verzelle =) China isch eifach dr Hammer. dLuet si hannae fruenldech, ds esse isch delicious und mandarin rockt =) Leider si ueser Leader ned so dr hammer, aber mir machae ueses beste drus... Es isch ned geng eifach gsi, de Studente ds verzelle, was uese Houptgrund isch, das mir nach China si cho. Meistens hei mir glich hennae gueti Gspraech gha und hei ihnae uesi Asichte vom Laebe choenne verzelle. Die meist hei no nieh oeppis vo Jesus ghoert oder nume vomene kommunistische Lehrer ihr Schueu. Mir hei aber ou gmerkt dases es paar christe git und dU-Church funktioniert ziemlech guet. Nume gseht mae das ned ir oeffentlechkeit...

Mir sie no hiae ds HongKong bis am 19. Juni u nacher fluegae mir zruegg nach Jamaika wo mir no 1 Wuchae Schueu hei...

Ig mues mau dr Compi oeperem anderem ueberlah und probiere euchi Mails so schneu wiae moelgech ds beantwortae

a liebe Gruess ids Fuessballland
Michu

Churz vorem Abflug....

Hallo zämä,

I 5 stung hockä mir scho im Flugi nach Los Angeles... Mir hei hüt am morgä no ä Sitzig gha und etzä chöi aui mitcho. Ou diä wo ds Geld no ned ganz zämä hei. Normalerwis machä sie das ned, aber weu si hei Fehler gmacht, isches chli speziell...

Üsä Plan gseht so us, dass mir uf LA flügä. Dert tüä mir zwöi mau übernachtä bevor mir de üsä 15h Flug uf Hong Kong atrettä... Am 20. Juni simer wieder zrügg ds Jamaika und hei no ä Wuchä wo mir ustuschä was mir aues hei erläbt...

Am 13. Juli chumä ig de definitiv wieder hei. Wär cool, we es paar a Flughafä chömä =) Das geit ja no es Zitli...

Wär cool we Dir für üses Team chöit bätä... Thx,

ä ganz liebe Gruess

Tüet ned zwüscht =)

Michu

China Ticket....

Was ig euch ds verzellä ha, isch nüme so cool wiä ouscho... Das aui drus chömä, fangi doch ganz vo vorä ah.

Mir si 9 Studentä und 4 Staffs wo nach China i üsä Outreach wei ga und hei üs i 2 Teams ufteilt. Natürlech hei mir für jede es Flugticket buechet. Eis isch öppä 1200 US$ gsi, auso ä super Deal =) Numä hei si öppä vor zwo Wuchä gmerkt, dass dr Rückflug umänä Monet ds früech buechet hei. Auso am 21. May statt am 21. Juni. Es het sech usägstehlt, dass dr Leiter vo üs, wo das aues organisiert het, am Reisebüro schrifltech es faltsches Datum het bestädiget.

Mir hei das natürlech soschneu wiä möglech wöuä ändere, was ned ganz eifach isch weu mir mit der glichä Airline müessä flügä, da si ds Geld natürlech nüme zrüggzahlä. Dr neu Flug chostet etzä 811 US$ meh. Natürlech het niermer vo üs grad so 800 $ zviu ufem Konto.

Mir si aber drvo überzügt, das Gott üs ds China wot bruchä i derä Zit. Drum hei mir üs entschidä, dass aui wo 800 $ scho im YWAM-Konto hei, dr Flug glich so buechä. Auso das Geld wär planet gsi für in China ds läbä. Das isch bi mim ganzä Team möglech gsi... Drum hei mir üs vor rund 2 Stung entschidä diä Tickets für üses Team mit em richtigä Datum ds buechä. Numä fehlt üs das Geld etzä für zum dert Läbä. Diä gueti Nachricht isch, dass mir gö wiäs planet isch. Diä schlechti, dass jedä vo üs 800 US$ meh brucht... 

Faus öpper vo euch, wo dä Blog list, üs finaziell wet ungerstützä, wär das natürlech super. Aber was no wichtiger isch, we Dir für üs chöit bätä. Es isch ä grossä Schritt ids ungwüssä und mir vertrouä Gott, dass er üs ou i derä Situation hiuft. Mir gseh das aus ä gueti Glägäheit uf Gott ds luegä und ned ds überlegä ob das möglech isch oder ned. Weu wet so uf ds Meer luegsch, gseht ou ned möglech us, das mä da eifach so chönnti düräloufä =) (2.Mose 14:16)

Mir si gspannt wiäs wird usächo und si überzügt, dass Gott wird mit üs si...

aunä ä cooli u gsägeti Zit

greez Michu

Da in China Missionare offiziell ned innä dörfä, hei mir während denä 7bä Wuchä ke Internetkontakt und drum chani hiä ou schlecht News mitteilä. Faus Dir glich wettet wüssä, was mit üs so geit, gits ä Newsletter vo üsem Outreachteam. Faus du dä wettisch, müesstisch mir das schneu schribä... Er wird ned Dütsch oder Chinesisch si, sonder Englisch.... =)

no guet 2 Wuchä...

am mäntig i 2 Wuchä flügä mir uf Los Angeles. Dert bini äbä scho gsi aber i ha sicher no lang de aues gesh. Dert blibä mir gloubes für 2 Nächt befor mir de definitiv uf HongKong flügä.

Mir si am ameldä für üser Visa für China. Wär cool, we Dir dafür chönntet bätä, dass aues guet geit. Das isch hiä ds Jamaika ned so sicher... dJamaikaner hei ziemelch grossi Problem mit ihrnä Visas. Diä bruchä für jedes Land wo si zwüschälandä es Visa. Das isch vou krass aber he ou siner Gründ.

Letscht Wuchä hei mir ä hennä coolä Speaker gha. Er heiss Mark Cahill und het über ds evangelisiere gredt. Das isch vou idrücklech gsi. I ha scho lang nüme soooo viu glehrt. Er isch dr Autor vo zwöi Büecher: "One things you can't do in heaven" und "one heartbeat away". Faus Dir meh über ihn weit wüssä, de chöit dir mau uf sini Homepage ga: www.markcahill.org

oder wartä bis ig heichumä, weu ig wirdä euch bestimmt vo däm verzellä!!!

Letsch Weekend heimer ändlech mau chli Freizit gno. Ig und dr Josiha hei üs das natürlech ned la näh und si ds ganzä Weekend wäg gsi. Üses Ziel isch dr BlueMountain gsi. Mit über 2250m isch das dr höchst Berg ds Jamaika. Mir si am Fritignami 3.5h uf Kingsten gfahrä und hei dert bimänä Koleg gschlafä. Früch am Morgä hei mir probiert mit Busä und Taxis möglechst nöch a Berg härä ds cho. Am hauni eis hei mir das de gschafft und hei agfangä loufä.

Nach 4.5h simer de ou scho ufem Peak gsi. Es isch gar ned so sträng gsi wiu aui Jamaikaner gseit hei. Mi hets ehner wiä ä gmüetlechä Spaziergang tüecht =)

Nacherm herlächä Sonnäungergang hei mir hei üser Schlafseck usgrollt und pfusset.... Auso es isch Ar...... chalt gsi, aber mir heis überläbt. Am Sonntig si mir ganz müed wieder zrügg uf Montego Bay id YWAM-Base....

Am bestä Dir lueget euch dBilder selber ah...

Das Weekend isch ziemelch vou. Am Samstig gani uf Logo2 ga häufä schaffä. Das isch äs OM Schiff mittere grossä, christlechä Bibliothek druffä. Diä siä hiä öppä für 3 Wuchä und verchoufä christlechi Büecher ganz billig....

Am Sonntig gö mir mit üsem Outreach id Gmeindä und probiere dLüt ds mobilisiere und chli vo üserä Arbeit ds verzellä.... Auso i ha äuä ke Zit für a Strand ds gah =(

wünschä euch es schöns Weekend

God bless you

Michu

huhu....

So, ig medlä mi ou wieder mau uf dem Wäg. Hüt hei mir Fast- & Bättag gha. Immer im erstä Donnstig im Monet bättä mir für diä andere Base und no viu andersch. Das isch für mi geng ä hennä usäforderig, weu wenn ig am Morgä ufstah, de schreit mi Buch mau nach essä und wes da nüt git, de geit das dr ganz Tag witer =) aber ig ha emu umä eis überstandä...

Letsch Sunntig simer zur Halbinslä usägschwumä. Mi gseht se ufem Foro vor Base. Es gseht gar ned so wit us, aber mir hei glich 1.5h gha. Mir si aber schön langsam gschwummä und hei derzuä nochli gschnorchlet. Das isch hennnnnä schön gsi. Ds Wasser isch ganz klar und warm gsi. Mir hei ganz viu verschidäni Fischä, Krebsä, Seeiglä und no ganz viu andersch gseh. Ds Seesternä hets soviu gha, das mir diä fasch nümä hei beachtet. Wiä das sech diä vorwärtsbewegä isch no speziell. Wo mir diä hei usägno, hättä mir ned dänk, dassech diä chöi bewegä. Nacher si mir ä grossä Chübu Glacä ga choufä und si mit em Taxi hei gfahrä.

Morn imänä Monet, auso dr 4. Mai flügä mir uf Los Angeles und nacher uf China. Mir gö etzä äbä ned über NewYork, weu das meh hätti kostet. Los Angeles hani zwar scho gseh, aber wird sicher ou cool...

An 2. + 3. Mai gits da no es rissä Konzert mir öppä 50000 Lüt. Dr Tobi Mac vo DC Talk chunnt und no schüsch es paar cooli, christlechi Bands. Türä Tag machä sie so Motocross shows. Das wird sicher no lustig.

Wünschä euch ä cooli Zit

bis es anders mau

Jamaica Outreach - BullBay

Hallo,

Letsch Wuchä, auso vom Samstig bis am Donnstig bi ig mir mirä Outreach Gruppä in BullBay gsi. Das isch uf dä andere Sitä vor Insle, öppä 8 Mailä östlech vo Kingston. Mir hei birä Rastafari Surfer Community gläbt.

Am Afang hei mir üs chli gfragt, was mir da söuä bewürkä. Nach dä erstä paar Täg, hei mir aber ganz cooli Gspräch mit ihnä gha. Es paar si hennä offä gsi und hei sech interessiert was mir so machä und wiso das mir zu ihnä chömä. 

Näbä bi hei mir ouno chli chönnä probiere ds Surfä. Aber so wiä das ds Jamaica so isch, hei mir di meisti Zit mit wartä verbracht =) Es het de glich no klappet und si hei üs chli zeigt wiä das am bestä lehrt. Ig ha emu alleini chönnä ufstah und dWellä abärittä. Mit em Kurvä machä hets no ned so klappet. I hoffä mir überchömä de nomau dGlägäheit zum üsi Fähigkeitä chli ds verbesserä.

Gester simer uf Negril gfahrä ga Kippägumpä. Es isch chli meh aus 10 Meter höch gsi und vou touristisch. Zum Glück simer scho früech dert gsi, so hei mir öppä 3 Stung de Felsä fasch für üs alleini gha. Es isch eifach schöööön gsi. Es paar Frouä heis ned ganz gschafft grad abäzgumpä und diä chöi etzä nüme so guet hockä =) Aber ig bi mau zueversichtlech und dänkä, dasses irä Wuchä scho nüme so schlimm isch....

So, das wärs ou scho wieder gsi

Bis es anders mau

Michu

PS: Für diä wos interessiert, ig ha dHaar geng no ned gschnittä, aber si nervä ziemlech!!!

Churz vorem Jamaica Outreach

Hey,

I ha mi scho lang nüme gmeldet hiä und cha das ou ir nächstä wuchä ned. Drum schribi etzä no schneu es paar zielä was mir ir hiä so machä.

In äs paar Stung fahrä mir etzä id BullBay für ein Wuchä und propiere dRastafaris vo üsem Gloubä ds überzügä. Mir überchömä ou dGlägäheit ds probiere ds Surfä =) ig bi mau hennä gspannt wiä das so wird. Es wär cool we dir für üsi Gruppä chönntät bättä.

Diä Wuchä si hiä uf dr Base no 60 Stundentä vo Amerika hiä gsi. Zum Teil isches no lustig gsi, numä hei mir viu meh zMorgä müessä machä. Drum bini fasch froh, das diä wieder gö =)

So, ig mues mau schiebä, i 30min fahrt dr Bus

Häbät ä cooli Wuchä

Michael

umä eis es paar neui zilä....

Mir si scho chli am vorbereitä für üsä Outreach im Mai. Mir hei üsi DTS-Klass i 4 Gruppä iteilt. Eis Team geit uf Albaniä, eis uf Gambia (West Afrika) und zwöi uf China. Ig bi i eim vo denä zwöi Chinateam. Zersch flügä mir uf New York und blibä dert für öppä 2 Nächt. Nacher flügä mir uf Hong Kong und blibä dert für zwöi Wuchä ihr YWAM-Base. HongKong isch angersch aus China, weus bis vor 10 Jahr brittisch isch gsi und dChinesä 50 Jahr kener Gsetzt dörfä änderä. Nach denä zwo Wuchä gö mir aus Touristä ids "richtigä" China. Ig bi ziemlech gspannt wiä das de wird aber ig freuä mi natürlech ou :D

I zwo wuchä hei mir dr Jamaika Outreach. Da gö mir mir üsä Teams i verschidenä Plätz ds Jamaika. Mir gö uf Ocho Rios. Dert si diä schönä Stränd und dSurfer. Vilech hei mir dGlägäheit, dass mir chöi ga probiere ds surfä. Wär vou fätzig, aber das isch ned üses Houptziel =)

Hüt simer inä jamaikanischi Landchiuchä gangä und hei dert chli vo YWAM verzellt und mit dä Chind Sunntigsschuel gmacht. Dr Gottesdienst isch 3.5 Stung gangä und isch ziemlech andersch gsi aus di anderi Chiuchä wo mit bsuecht hei. Es het öppä 40 Lüt gha.

Ig ha öppä 5 min. verzellt was mir so machä und wiä ig mi entschidä ha diä Schueu ds machä. Ig bi schochli nervös gsi, aber es het no gfägt. dChing si ziemlech schüch gsi, aber so gägä Schluss hei si sogar chli mitgmacht.

Gester hei mir nochli Tourist gspilt und si zu bekanntä Wasserfäll gangä. Mir hei chönnä ufächläterä, was ned geng eifach isch gsi. Ds Süesswasser vom Fluss isch direkt ids Meer gfossä, das isch no cool gsi,,,

Mir si mitemä TaxiBus dert härä gfahrä. Es isch es glich Bössli gsi wiä mir dahei eis hei. Numä si 19 Lüt dinnä ghocket für zwöi stung. Das isch scho chli läng gsi, dafür hei mir numä 260 J$ zaht pro Person für ei wäg. Das isch öppä 4 Fr.

Morn hei mir wieder Schueu. Es chunnt ä Speaker vo Canada.

Wünschä euch ä Gsägneti Zit

Michu

scho gli 3 Wuchä ds Jamaika

Diä zwöiti Schueuwuchä isch verbi und ig bi am nächstä Dienstig scho 3 Wuchä im reggae Land.

Mir hei ir letschtä Wuchä ä ganz ä coolä Guestspeaker vom Sierra Leone gha. Ds Theam isch "Nature and Character of God" gsi. I ha ned aues verstandä, was er gseit het, aber ds Meistä hani verstandä.

Hiä isch mau no es Föteli vo üsere DTS-Klass

Mir si 22 Studis, 6 drvo chömä vo Jamaika. Dr Restä usert ig isch vo Amerika oder Kanada. Dr Japaner läbt ou ds Amerika. 

Am Donnstig nami machä mir geng ä Isatz bimänä Heim oder schüsch ö Organisation. Ig bi mit es paarnä andere ines Heim für schwererziehbari Ching gangä. Di meistä si dert weu si gstohlä oder gmordet hei. Das isch no krass!!! Diä si zwüschä 7-15 Jahr aut. Mir hei mit ihnä gschuttet und gred. Das isch no lustig gsi.... =)

ig mues mau ga nä fium luegä =)

tschüsschen

Di ersti Schuelwuchä isch verbi

Es isch ganz schneu ganä u de isch scho Fritig gsi. Ig ha i derä Wuchä ganz viu erläbt und glehrt.

Ig bi dr einzig wo Englisch ned aus Muettersprach heti mirä Klass u drum chumä ig mir mängisch chli verlohrä vor. Aber Ig ha ouscho viu glehrt und verstah ds meistä wo si verzellä. Bi dä Jamaikaner hani chli meh müeh. Ig cha aber ouscho es paar Wörter "Padua". Mir si ä ganz ä cooli Klass, es louft emu immer öppis.

Mir wüssä no ned gnau, wo mir üsä Outreach machä. Das isch ä zwöi monatigä Missionsissatz. Entweder gö mir uf Albanie, Gambia oder China. Mi wür China fasch am meistä glustä, aber mau luegä was Gott mit üs planet het....

Hüt simer uf Montego Bay id Stadt gangä und hei dä Obdachlosä ds Essä gä und für se Bättet. Das isch ziemlech ä usäforderig gsi. Ig ha mit denä probierts ds redä, was ned ganz eifach isch, da si so ä starchä Jamaica akzent hei, das ig würklech fasch kes Wort ha verstandä. Mängisch isch mir de öpper cho helfä oder mir hei eifach für sä bättet und Worship gmacht. Am Schluss isches emu es cools Erläbnis gsi und sie hei emu wiedermau öppis guets ds Essä übercho. Wiviu das sie hei mitgnao, vo däm wo mir ihnä verzellt hei, cha i ned sägä. 

Morn, auso am Sonntig, hei mir ä Tag frei. Mir gö äuä chli a Strand ga sünnelä.

Wünschä euch ä gsegenti Zit

Greez Michu

di erstä Täg ds Jamaica

ig bi etzä de scho gli ä Wuchä ds Jamaica. I dä letschtä Täg simer chli ir Base und am Strand umäghanget. Es het hiä ganz ir nöchi ganz ä schönä "Touristä Beach". Mi mues zwar 350 J$ Itritt zahlä, dafür isch er bewacht und schön zwäg gmacht. Eifach so richtig schön. =)

Userthaub vom Beach hets natürlech ganz viu Touristälädeli. Aber Ig ga fasch lieber ineä richtigä Ladä womer ned nach jedem Meter aquatschät und i Ladä zogä wird.

Das mir zum Strand chömä, müessä mir meistens mit em Taxi ga. Das isch ned ganz so eifach, weu si dir natürlech geng soviu Geld wiä möglech wei abchnüpfä. Ä Fahrt vor Base zum Strand chostet zwüschä 50-100 J$. Das isch öppä 0.75 - 1.5 Sfr. Für zrügg chostets öppä zwüschä 100 - 200 J$. Auso dTaxiprisä chamer ned mit denä ir Schwiiz verglichä.

 

Gester si di meistä Studentä vor DTS itroffä. Etzä hani zwe wo mit mir im Zimmer wohnä. Dr eint chunnt vo Texas und dr ander isch ä Amerikaner wo ds Kenia isch ufgwachsä.

Morn, auso am Mäntig, fangt de ou dSchueu ah. I gloubä es wird ziemelch asträngend aber ou spannend. I hoffä, dass ig dLüt verstah...

ä liebe Gruss

ds Jamaica isches no schön....

Für aui diä wos no ned ghört hei, i bi guet acho...

Nach 4 Stung Flug bini scho da gsi und es het ou schüsch kenner grossä Problem gäh. Diä bim Zoll si vou locker druffä gsi. Etzä hani mau es Bewilligung für 2 Wuchä ds Jamaica dsi u nacher mues ig irgend ä Bestätigung bringä. Aber da luegt de YWAM für aui Studis zämä...

Wo ig bim Flughafä bi acho, ha i grad erfahrä das hüt dr Bob Marley Geburi het u si drum diä ganz Wuchä tüä Festä. Das machä si aber hiä gloubes ds ganzä Jahr. Nachdem ig dr erst sJoint ha abotä übercho am Flughafä, het mi ouscho dr Josh gfundä und mi sicher uf dr linkä Strassäsitä id Base bracht.

dBase isch ziemlech schön. Si ligt chli vom Meer wär, so dass mä ä schöni Ussicht uf ds und Montego Bay het. I ha mir la sägä, dases ziemlech kriminell isch und mir ned am Abä eifach so sött id Stadt ga. Dafür hets hiä ir Base ä grossä Pool, das isch ziemlech gmüetlech... =)

Bis etzä hani ou no kenner Rattänä gfundä, wofür Ig ziemlech dankbar bi. Es het numä öppä 6cm grossi Kakerlakä im Schlafzimmer. Mit denä chani gloubes Läbä.

Im Momänt louft hiä ned so viu. Es si grad zwo Schuelä fertig gsi u drum si etzä di meistä scho abgreisst oder machä das no bis ändi Wuchä. Morn sött de no ä Kanadierin cho, de simer emu scho ds zwöit vor neuä DTS-Klass.

Es het no ä Bärnerin und ä Adelbodnerin da. Si hei hiä ds DTS gmacht u blibä nochli lenger. Am Sonntig söttä de vor eintä no zwe Brüetschä cho u de wettä si de chli ga umäreisä.

Hüt simer es Chinderheim ga bsuechä. Das isch vou Härzig gsi... Numä ha Ig dr Föteler vergässä. Nachem mir mit dä Kids si ga schuttä, het üs einä wo im Heim zeigt, wiämer Kokosnüss uftuet und isst. Diä si mega guet gsi..... =)

Morn gö mir de nacher Worship chli a "Touristästrand"...

grüessli

Es paar Täg ds Myrtle Beach

Ig bi sit am letschtä Samstig wieder alleini ungerwägs. dFiona isch zrügg uf Phoenix gfahrä und ig bir vor Westküstä ad Ostküstä greiset. Nach 6 Stung flügä und 12 Stung mit em Greyhound Bus bini de ds Myrtle Beach acho. Es isch ä cools Reisli gsi und i hät es paar lustägi Gschichtli ds verzellä, vilech speter mau....

Gester am Abä hei mir hiä no Super Bowl gluegt. Das darf mä natürlech ned verpassä, wemer scho ds Amerika isch. dStimmig isch ned so cool gsi, weu mä hiä ir gägäend beidi Teams ned gärn het. Aber gluegt hei natürlech glich aui. Scho numä dWerbig isch ds luegä wärt gsi... )

Hiä isch ä ganz coolä Wärbespot =) 

http://www.youtube.com/watch?v=wncf-SkYdds

Hüt hani ä witeri Tour mit mim modernä eigänger Velo gmacht. I bi so chli ir Gägend umägfahrä, da hani dänkt i chönnt mau ä andere Wäg näh, vilech isch dä ja ned so gfährlech. Aber es isch ned so gsi... Dä Freeway het nedämau ä Pannästreiffä gha und de bini haut ganz rechts ufem "wissä" gfahrä... Auso i has überläbt =) Es isch mir aber scho ned so wohl gsi. Chli speter wo ig de wieder ufem bekanntä Freeway bi gfahrä hani plötzlech es Polizeiouto gseh Blinkä ufem Pannästreiffä. Zrügg hani schlecht chönnä u de bini haut eifach witer gfahrä. Aber er het gar ned wägä mir ghautä gha, er het schüsch es Outo usägno. So bini de eifach näbä dürä gfahrä und ha ihm lieb zuägnickt... 

Morn flügi de definitiv uf Jamaica

greez

Michu

Los Angeles isch ou scho fasch verbi...

Nach 8.5 Stung mit em Greyhound Bus si mir ds Los Angeles acho... Mir hei üs grad ar Ufgab "Hotel suechi" agno, da si scho diä erstä Problemli uftoucht. Obwohl ÖV in Amerika es Frömdwort isch, wär LA gar ned so schlecht usgrüstet. Aber bis mir ds Busnummerchaos so haubwägs hei durchschout, isches scho fasch fiester gsi. Ds Hotel hei mir de glich no gfundä, numä isches ned so zentral glägä gsi. Dr Long Beach si mir de glich no ga luegä und es isch schön gsi, numä isch nüt gloffä, weu grad ke Saison isch.

Am nächstä Tag hei mir chli Downtown LA unsicher gmacht. Mir si vom eintä Hochhuus zum andere gloffä u hei es paar Föteli gmacht. We mä scho ds LA isch, de mues mä natürlech ou Hollywood ga bsuechä. Bim "Walk of Fame" hei mir gmerkt, dass es no viu für üs unbekannti Stars git. Bir Britney hei mir wäg gluegt dafür hei mir vom "Johnny Depp" es föteli gmacht. Berüehmt si mir ned wordä, obwohl mir klar müessä sägä: am usgseh häts ned gfäut. =)

Etzä hockä mir am Flughafä u wärtä bises Morgä wird.....

byebye

Michu & Fiona

Zrügg vom Grand Canyon und Tucson

I mues euch wieder mau chli verzellä, was mir i dä letschtä Täg hei gmacht. Mir hei es Auto gmietet und hei fasch 1000 Meilä zrügg gleit, das si rund 1550 Kilometer gsi. Aber für ds Verhältnis vo dä Amerikaner isch das ä Chatzäsprung =).

Zersch si mir zum Grand Canyon gfahrä und hei dert es paar cooli Föteli wöuä machä. Nach 30 min si dWolchä cho und mir hei gar nüme abägseh. Zum Glück hei mir vorhär no es paar Biudli gmacht. Mir si de glich öppä 20 min. abägloffä obwohls ziemlech fest gschneit het.  Am nächstä Tag si mir vo Flagstaff us witer nach Tucson gfahrä. Dazwüschä hei mir no es paar Umwägä zu dä "Kaktüs" gmacht.

Nach eirä Nacht in Tucson si mir fasch direkt wieder hei nach Phoenix. Mir hei no ds Old Tucson Filmstudio bsuecht, wo si früecher ganz viu Western Fiumä dreiht hei. Am bestä luegät dir dBiudli grad selber ah, es het ziemlech cool usgseh,,,,

Auso etzä si mir wieder ds Phoenix und planä c

hli wiä mir uf Los Angeles wei. Mir wettä am 29. Januar mit em Greyhound Bus abfahrä... Mau luegä ob das de ou würklech klappet =)

grüessli

es paar Zielä meh

I ha no öppis vergässä ds schribä, und zwar bini am Sonntig no uf Key West gfahrä. Auso das si ä Inslä öppä 160 meilä vo Miami wäg. Natürlech hets da ou ä Highway usä wo vo eirä Inslä zur andere geit. Eigentlech hät ig dert es paar cooli Föteli wöuä machä, numä isches eifach bevölkt gsi und het grägnet. Drum isch dr ganz Usflug chli ä flop wordä =( Janu, de mues ig de äbä no es anders mau dert härä ga, einisch wes de schön isch. Ig bi nacher mit es paarnä vom Car chli ga lädälä und natürlech ids Hardrock Cafe ga ässä...

Ig und dFiona si grad chli am planä, was  mir wei machä. Etzä hei mir vom 24.-26. Januar es auto wöuä miete das mir denn zum Grand Canion chöi fahrä. Mir hei no schneu ds Wetter chli agluegt und gmerkt, dass es um diä zit so gägä di 0°C isch u das isch grad chli chaut. Aber lut Peschä: "Chaut gits ned u schmärzä si geil". Drum gö mir glich.... Mir nähme eifach ä grossi Bettfläschä mit u de wärdä mir das scho überläbä. Mir si etzä mau optimistisch und fahrä mit Summerpneu zum Grand Canion....

bye

in Phoenix

Hallo,

I bi gester am Abä ds Phoenix acho und da es ke Zoll oder so het gha, bini sogar pünktlech gsi... DFiona isch mi am Flughafä cho abholä und es het ou schüsch aues klappet. Etzä cha ig da birä Family schlafä, isch vou gmüetlech... Dussä isches no ned so warm, aber i gloubä gägä Mittag wirds öppä so 20°C.

Am 1. Februar ha ig ä Flug vo Los Angeles nach Charlotte buechet. Vo dert us gani nacher mit em Greyhound Bus witer, oder zrügg uf Myrtle Beach wo ig no es paar Täg bir Colleen cha schlafä... 

ä liebe Gruess

Just arrive in Miami

Nach über 4 stung bus fahrä und umäloufä bini ändlech bi mim gsuechtä hostel acho und si hei sogar no platz gha für mi.... =) Auso ds bus fahrä fägt schüsch hennä, es chostet ned viu und mi trifft geng wieder cooli lüt wo da wohnä. Dä Bus wird vorauem vo denä brucht wo kes outo vermögä u das si äbä di iheimischä u ned dTouristä. 

Etzä bini ds miami am south beach. Auso es isch schono schön da und vorauem warm. I gloubä es geit so gäg di 30° zuä, wo ig mit mim Rucksack dür dStadt gloffä bi, hani ziemlech warm übercho...

I ha zwar no ned soviu Föteli vom hiä gmacht, aber eis isch glich no schön....

I blibä no bis am mäntig hiä und flügä denn de uf Phoenix zur Figä. Das wird sicher ou lustig...

sit gsegnet

greez Michu

Hostel in Fort Lauderale buechet

Hallo zämä,

I sitzä da grad gmüetlech ar sunnä und duä chli mailä und blogä. Auso i bi hüt am morgä vo myrtle beach nach fort launderale gflogä. I ha grad wöuä icheckä für ä flug uf new york (wo i nacher ä aschluss flug uf fort lauderale hät gha) da hei si mi gfragt ob i ned grad direkt wot flügä. Ds flugi geit i 20 min und es heig no grad ä platz gäh. Das ha i natürlech gmacht. I ha numä dr ander flug buechet weu dä billiger isch gsi aus dr direkt.

Auso etzä hocki genau da:

Das isch es Hostel wo i mau für 2 nächt ha buechet. Ig bi hiä mitemä ehepaar vo new york härä cho... Diä si vou gmüetlech. Was i nacher machä, weiss i no ned so gnau. I flügä am 21. nacher witer uf phoenix wo ig nacher dFigä triffä. 

ä warmä gruess

michu

guet glandet ds MyrtleBeach

vor ca. 24 stung bini etzä glichno ds myrtle beach glandet.  im flüger si numä 13 lüt gsi und i ha ganz viu platz gha.  =D wo mir zur colleen si gfahrä, ha i scho zerstä mau öppis vom amerikanischä wahlkampf mit übercho. 

Das si aui rebublikanschiä Kandidatä wos sie mit sand dargsteut hei. Das gseht vou cool us. Diä chömä drum nächstwuchä sich cho vorsteuä...

Hüt isch ds wetter mit 18°C scho chli gmüetlecher aus gester. Aber äbä geng no winter ;)

I ga mau nochli ga joggä, wünschä euch ä cooli zit

greez Michu

ds Philadelphia gstrandet

Hey,

i bi hüt auso dr 12. januar zürich abgflogä und hät eigentlech uf Myrtle Beach wöuä... Numä hei mi ds philadelphia diä "liebe" Zollbeamtä usägno und aues dürsuecht, so dass ig dr anschlissend flug verpasst ha. Janu, es het hüt ke flug meh richtig myrtle beach und so ha ig da müessä es hotle buechä. Isch grad chli müehsam, weu i dColleen, sie wär mir a flughafä cho abholä, ned cha erreichä.  Etzä hani ä neuä flug für morn am morgä am 0715 Uhr. 

no 10 täg

etzä geits numä no 10 täg bis ig uf myrtle beach flügä. auso für aui wos wunder nimmt: nei, packt hani no ned :D aber i mues mi etzä de schomau dahinger machä... 

i ha no grad es chlises problemli mit mim pass. dä isch im moment no uf dr jamaikanischä botschaft damit si mir dert es visum für 5 monet chöi inächläbä. i gloubä aber dä sötti scho cho bis ig abflügä u schüsch mues ig uf plan B uswichä... auso wemers gnau nimmt, gits plan B gar ned und es wird näh ou ned bruchä :D

so, das wärs ou scho gsi...

greez michu